Crowne Plaza Vientiane

ກິນລົມຊົມວິວ ແລະ ເພີດເພີນໄປກັບ 5 ແຫຼ່ງທ່ອງທ່ຽວນ້ຳຕົກຕາດໃນວຽງຈັນ

ກິນລົມຊົມວິວ ແລະ ເພີດເພີນໄປກັບ 5 ແຫຼ່ງທ່ອງທ່ຽວນ້ຳຕົກຕາດໃນວຽງຈັນ

ກິນລົມຊົມວິວ ແລະ ເພີດເພີນໄປກັບ 5 ແຫຼ່ງທ່ອງທ່ຽວນ້ຳຕົກຕາດໃນວຽງຈັນ

ສະບາຍດີ! ສຳລັບຄົນທີ່ກຳລັງວາງແຜນຫາບ່ອນທ່ຽວພັກຜ່ອນຢ່ອນໃຈ ແຕ່ບໍ່ຢາກໄປໃສໄກ... ແອັດມີແຫຼ່ງທ່ອງທ່ຽວງາມໆມາແນະນຳ ເຊິ່ງຢູ່ອ້ອມແອ້ມພາຍໃນນະຄອນຫຼວງເຮົານີ້ເອງ! ບໍ່ໃກ້ ບໍ່ໄກ! ແຖມຍັງເໝາະກັບຄົນທີ່ຢາກໄດ້ບັນຍາກາດທຳມະຊາດໆ ສົດຊື່ນໆນຳອີກ ນັ້ນກໍຄື…ນ້ຳຕົກຕາດ 5 ແຫ່ງທີ່ເຮົາບໍ່ຄວນພາດ! ມາເບິ່ງກັນເລີຍວ່າມີບ່ອນໃດແດ່

 

1. ຕາດມູນ (Tad Moun Waterfall)

ໂດຍລວມເປັນຕາດນ້ອຍໆຕາມລະດູການ ແຕ່ມີກິດຈະກຳໜ້າສົນໃຈເຊັ່ນ: ຍ່າງປ່າ ແລະ ຂີ່ລົດຖີບ. ຕາດມູນແມ່ນອ້ອມຮ້ອມໄປດ້ວຍຕົ້ນໄມ້ຫຼາກຫຼາຍທີ່ໃຫ້ຄວາມຮູ້ສຶກທຳມະຊາດໆ ແຖມຍັງມີຕູບໃຫ້ນັ່ງຊິລໆ ຈິບເບຍ ຊິດແຊັດ ລົມກັນກັບໝູ່ ກັບແຟນ ກັບຄອບຄົວ ໄດ້ຟິລລິ້ງ ແລະ ບັນຍາກາດໃນວັນພັກພ່ອນດີີໆໄປອີກ.

ແນະນຳ: ມີຄົນຣີວິວມາວ່າຄວນໄປຊ່ວງເດືອນ 5 ດີສຸດ ເໝາະກັບອຸນຫະພູມຄວາມຮ້ອນຂອງບັນຍາກາດ ແຖມຫຼິ້ນນຳ້ມ່ວນ ແຕ່ບໍ່ແນະນຳໃຫ້ໄປຊ່ວງເດືອນ 12 ເພາະບໍ່ມີນ້ຳຫຼາຍ.

ສະຖານທີ່ How to ໄປຕາດມູນ: ຕັ້ງຢູ່ເມືອງສີໂຄດຕະບອງ. ອອກຈາກຕົວເມືອງວຽງຈັນແລ້ວມຸ່ງໜ້າໄປຕາມຫຼັກ 10 ຈະເຫັນຖະໜົນເລກ 13 ເໜືອ ແລ້ວຂັບໄປກໍຈະເຫັນປ້າຍທາງຂວາມືວ່າ ໄປນ້ຳຕົກຕາດມູນ. ຈາກນັ້ນກໍລ້ຽວຊ້າຍເຂົ້າສູ່ຖະໜົນຄອນກຣີດ. ແລ້ວກໍຂັບຕໍ່ໄປອີກ 7-10 ກິໂລ ກໍຈະຮຮອດນຳ້ຕົກ.

 

2. ນ້ຳຕົກຕາດຫີນຄັນນາ (Hinkhanna Waterfall)

ເປັນອີກບ່ອນທີ່ເໝາະກັບການປິກນິກ ຫຼື ມານັ່ງກິນເຂົ້າ ຊິລໆ ເພີດເພີນໄປກັບທຳມະຊາດ ເອົາສາດມາປູນັ່ງກິນເຂົ້າແຄມນ້ຳກໍໄດ້, ມີຕູບຫຼາຍຕູບມຸງດ້ວຍສັງກະສີ (ບັນຍາກາດຈະຕ່າງຈາກຕູບໄມ້ແຄມນ້ຳໄປອີກແບບ)

ແນະນຳ: ຖ້າໃຜບໍ່ມັກຖືເຄື່ອງຫຍັງຫຼາຍໄປ ບໍ່ຕ້ອງຫ່ວງເພາະເພິ່ນໄດ້ໃຫ້ບໍລິການ ອຳນວຍຄວາມສະດວກໃຫ້ແກ່ລູກຄ້າບໍ່ວ່າຈະເປັນ ອາຫານການກິນທີ່ມີຫຼາກຫຼາຍເມນູ, ກົງເບັງໄວ້ລອຍນ້ຳ​ ໆລໆ

ສະຖານທີ່ How to ໄປນ້ຳຕົກຕາດຫີນຄັນນາ: ຕັ້ງຢູ່ເມືອງນາຊາຍທອງ. ຂີ່ລົດຈາກຖະໜົນເລກ 13 ເໜືອ ໄປຍັງຫຼັກ 15 ແລ້ວກໍຈະເຫັນປ້າຍຂ້າງຊ້າຍຊີ້ບອກ. ຈາກນັ້ນກໍລ້ຽວຊ້າຍ ແລະ ຂັບໄປອີກ 10 ກິໂລກໍຈະຮອດນ້ຳຕົກຕາດ.

 

3. ຕາດວັງຫຼວງ (Tad Vangluang Waterfall)

ເປັນອີກບ່ອນໜຶ່ງທີ່ຮິດ ແລະ ກາຣັນຕີຈາກຫຼາຍຄົນທີ່ໄປເຊັກອິນມາ. ເໝາະກັບຄົນທີ່ຮັກທຳມະຊາດທີ່ແທ້ທຣູ ເພາະວ່າແນມໄປທາງໃດກໍເຫັນຕົ້ນໄມ້ອັນຂຽວກະຈີ. ຈຸດເດັ່ນແມ່ນມີຂົວທີ່ຍາວຢຽດ ໄວ້ຍ່າງຊົມວິວກໍດີ ຖ່າຍຮູບກໍດີ ແຖມຍັງມີກິດຈະກຳໃຫ້ໂຫນສະລິງຫຼິ້ນອີກ.

ແນະນຳ: ຫຼິ້ນນຳ້ໄດ້ ແຕ່ຫ້າມຫາປາ ເພາະຖ້າລະເມີດຈະຖືກປັບໄໝ 10,000,000 ກີບ

ສະຖານທີ່ How to ໄປຕາດວັງຫຼວງ: ຕັ້ງຢູ່ແຖວເວີນກະເບົາ ເມືອງປາກງື່ມ. ຂັບລົດໄປທາງຖະໜົນເລກ 13 ໃຕ້ ປະມານ 60 ກິໂລ ເພື່ອໄປຍັງເມືອງປາກງື່ມ ແລະ ຂັບໄປອີກ 2 ກິໂລ. ຫຼັງຈາກຂ້າມຂົວແລ້ວກໍຈະເຫັນປ້າຍໃຫຍ່ໆໂຄສະນານ້ຳຕົກຕາດ.

 

4. ຕາດແກ່ງຍຸ້ຍ (Kaeng Nyui Waterfall)

ປຽບເປັນດັ່ງນ້ຳຕົກແຫ່ງໃໝ່ຂອງເມືອງວັງວຽງ ເຊິ່ງເປັນນຳ້ຕົກຕາດທີ່ມີຈຸດເດັ່ນຢູ່ບ່ອນຄວາມສູງຊັນ ມີສາຍນ້ຳໄຫຼລົງມາເປັນຊັ້ນໆ ໄຫຼເປັນທາງຍາວ ເປັນວິວງາມໆໃຫ້ເບິ່ງ ຄິດພາບບັນຍາກາດນ້ຳຕົກຕາດທີ່ໄຫຼຈາກເທິງລົງລຸ່ມ ແລະ ລະອອງນ້ຳກະຈາຍໄປອ້ອມໆ ຖ່າຍຮູບກໍງາມໄປອີກ!! ແຖມຍັງມີໄຮກິ້ງ ຫຼື ໄປຍ່າງປ່າຕາມສໄຕລ໌ຄົນມັກລຸຍນຳອີກ!

ແນະນຳ: ສຳລັບຄົນທີ່ໄປຍ່າງປ່າ ຍ່າງໄປຮອດບ່ອນໜຶ່ງຈະມີນ້ຳຕົກຂະໜາດນ້ອຍໆ ມີບ່ອນໃຫ້ລອຍນ້ຳຫຼິ້ນ ຂໍແນະນຳໃຫ້ຢຸດພັກເຊົາຊິລໆແຖວນັ້ນກ່ອນ ສູດເອົາບັນຍາກາດດີໆອ້ອມໆ ແລ້ວຄ່ອຍຍ່າງຕໍ່. ອີກຢ່າງໜຶ່ງຢ່າລືມຖືເອົາຖົງທີ່ມັນກັນນ້ຳໄປນຳ ເພາະໄປໃກ້ໆນ້ຳຕົກຈະມີລະອອງນ້ຳຫຼາຍ ດ໋ຽວກ້ອງ DSLR ງາມໆແພງໆຈະປຽກ.

ສະຖານທີ່ How to ໄປຕາດແກ່ງຍຸ້ຍ: ຂັບລົດໄປຍັງຖະໜົນເລກ 13 ເໜືອ ເຂົ້າສູ່ເມືອງວັງວຽງ, ກາຍຜ່ານສະໜາມບິນ ແລ້ວລ້ຽວຂວາທີ່ໂຮງຮຽນປະຖົມໂພນເພັງ ແລ້ວກໍມຸ່ງກົງໄປຍັງບ້ານນາດ້ວງ (ຈາກໂຮງຮຽນປະຖົມເພນເພັງມາເຖິງປ້າຍນ້ຳຕົກຕາດແກ່ງຍຸ້ຍ ປະມານ 3 ກິໂລ). ຈາກນ້ັນກໍຂັບກາຍໄປໜ້ອຍໜຶ່ງກໍຈະເຫັນປ້າຍນ້ຳຕົກຕາດແກ່ງຍຸ້ຍຕັ້ງຢູ່ບ່ອນຂວາມື ແລ້ວລ້ຽວໄປຕາມປ້າຍນັ້ນປະມານ 1 ກິໂລກໍຈະຮອດ.

 

5. ຕາດພັກຊອຍວອຍ

ໂດຍລວມແມ່ນບັນຍາກາດຄືກັບນ້ຳຕົກຕາດແຫ່ງອື່ນໆ ແຕ່ວ່າມີຈຸດເດັ່ນບ່ອນໜຶ່ງຄືນ້ຳໄຫຼມາຈາກບ່ອນສູງຊັນ ໄຫຼຜ່ານໂງ່ນຫີນໃຫຍ່ ເບິ່ງຕາມຮູບຈະໄດ້ບັນຍາກາດ ແລະ ຟີລລິ້ງແບບນ້ຳຕົກຕາດດ່ຽວໆ ໂດຍທີ່ບໍ່ຄ່ອຍມີຕົ້ນໄມ້ມາບົດບັງ.

ແນະນຳ: ສຳລັບຄົນທີ່ມັກຍ່າງຫຼິ້ນຕາມໂງ່ນຫີນ ຫຼື ນັ່ງຊິລໆແຄມນ້ຳ ອາດຈະໄປນັ່ງປິກນິກກິນເຂົ້າກໍໄດ້ ນ້ຳຕົກຕາດພັກຊອຍວອຍເປັນອີກໜຶ່ງທາງເລືອກທີ່ຄວນໄປ

ສະຖານທີ່ How to ໄປຕາດພັກຊອຍວອຍ: ຕັ້ງຢູ່ບ້ານນາຄັນທຸງ, ເມືອງໄຊທານີ, ນະຄອນຫຼວງວຽງຈັນ ຫ່າງຈາກເທສະບານນະຄອນຫຼວງປະມານ 50 ກິໂລແມັດ. ຂັບລົດໄປຕາມເສັ້ນທາງທ່າງ່ອນ-ບ້ານເກິນ ແລ້ວລ້ຽວຂວາທາງຕັດ ອອກໄປທາງເມືອງປາກງື່ມອີກປະມານ 23 ກິໂລແມັດ.

ເປັນແນວໃດກັບນ້ຳຕົກຕາດ 5 ແຫ່ງທີ່ແອັດມາແນະນຳ!? ເຖິງວ່າຊ່ວງນີ້ຈະບໍ່ມີເວລາອອກໄປໃສໄກໆ ການໄປທ່ຽວທຳມະຊາດເປັນອີກໜຶ່ງທາງເລືອກທີ່ເຮັດໃຫ້ເຮົາຮູ້ສຶກຜ່ອນຄາຍ ແລະ ຮັບພະລັງບວກໄດ້ ແຖມຍັງເປັນທຣິບ1ມື້ ຫຼື One Day Trip ທີ່ຕອບໂຈດກັບຄົນທີ່ບໍ່ຢາກໄປໃສໄກໆນຳ! ຖ້າໃຜມີໂອກາດໄປທ່ຽວກໍເກັບພາບມາຝາກ ແລະ ມາແຊຣ໌ປະສົບການໃຫ້ແອັດຟັງນຳເດີ້.

최신 객실 제공

Special Room Offer

Breakfast Anytime

Special Room Offer

Stay Longer Pay Less

Special Room Offer

Lao Visit Laos